Вашингтон испраќа тим во Македонија за поагресивен поглед на корумпирани актери и кај сегашните функционери и кај минатите, објави на Твитер американската амбасадорка Анџела Агелер.
Агелер појаснува дека тимот ќе ги разгледа сите можни одговори на присутната мината и сегашна корупција во земјава.
„На правосудниот систем во Северна Македонија му требаат повеќе истраги и обвиненија за да покаже дека никој не е над законот“, твитна амбасадорката.
Меѓународната заедница се поинтензивно ја става под лупа корупцијата во Македонија.
Најпрво изборот на новиот шеф на Обвинителството за борба против организиран криминал и корупција кој има лични познанства со челниците на ДУИ, ја „збуни“ американската амбасадорка Ангела Агелер, бидејќи како што рече, „САД потрошија милиони долари на обука на обвинители“ во правосудниот систем.
Набрзо потоа реагираше и евромбасадорот Дејвид Гир кој побара професионалност во институциите во случајот со доделувањето на македонско државјанство на Украинецот Олександар Онишченко, кој се наоѓа на црната листа на САД.
Вчера и амбасадорката на Германија, Анке Холштајн, истакна дека напредокот на Македонија на патот кон Европската Унија ќе зависи во голема мера и од успешното сузбивање на корупцијата.
Владата најави дека , ќе се бори против корупцијата со инсистирање на интегритетот и професионалноста на оние кои ги водат институциите.