Дејвид Бенет (57) се чувствува добро по експерименталната операција во Балтимор, која траела седум часа, информира Би-би-си известувајќи за првиот човек воопшто во чии гради почна да чука срце од генетски модифицирана свиња. Овој зафат бил последна надеж за спас на животот на Бенет а не се знае ни како ни колку ќе трае во периодот по трансплантацијата.
Докторите во медицинскиот центар при Универзитетот на Мериленд добиле дозвола од регулаторните тела да ја направат операцијата бидејќи Бенет немал друга опција а поради лошото здравје тој не можел да биде ставен на листата за трансплантација на срце од починат донор.
University of Maryland Medical Center
Проценките се дека 17 луѓе дневно умираат во САД чекајќи срце од донор, но ако срцата од генетски модифицирана свиња добро се вклопуваат во човек и човековиот организам ги прифаќа тогаш новата процедура би можела да ја смени оваа слика а со тоа да се зголемат шансите за преживување на пациентите.
Претходно беа трансплантирани други органи на луѓе од генетски модифицирани свињи. Во октомври минатата година хирурзи во Њујорк успешно трансплантираа бубрег од свиња на човек, но на пациентот му била прогласена мозочна смрт и немал шанси за преживување и покрај операцијата.
Но, Бенет се надева дека неговото ново срце ќе му овозможи да го продолжи животот. Тој преживувал со машина и бил во болница 6 недели пред операцијата откако му била дијагностицирана терминална срцева болест.
Свињата која била искористена за трансплантацијата била генетски модифицирана за да нема повеќе гени кои би довеле до отфрлање на срцето од телото на Бенет.