Основачот на ултрадесничарската група „Чувари на заклетвата“, Стјуарт Роудс, е осуден за организирање заговор за блокирање на победата на Џо Бајден на претседателските избори во САД.

Поротата во Вашингтон, по тридневно размислување, синоќа го прогласи Роудс за виновен за бунт, по речиси двомесечното судење кое ги разоткри напорите на екстремно десничарската група по секоја цена да го задржи Доналд Трамп во Белата куќа.

Роудс е ослободен од другите две точки од обвинението, кои се однесуваа на наводниот заговор.

Роудс не влезе со толпата во американскиот Капитол на 6 јануари, но е обвинет дека го водел заговорот што започна непосредно по изборите во 2020 година за да започне вооружен бунт за да се запре трансферот на претседателската моќ.

Пресудата претставува важна пресвртница за американското Министерство за правда и најверојатно ќе го отвори патот за обвинителството да оди со полна пареа во претстојните судења на други бунтовнички екстремисти.

Пресудата најверојатно ќе ги охрабри истражителите чија работа се прошири надвор од истрагата за лицата кои ја нападнаа зградата на Конгресот. Тие ќе се фокусираат и на други лица поврзани со обидите на Трамп да ги поништи резултатите од претседателските избори во 2020 година.

Американскиот државен обвинител Мерик Гарланд неодамна го назначи обвинителот Џек Смит за свој специјален советник да ја надгледува истрагата за обидите за дискредитирање на изборните резултати, како и посебната истрага за изнесување на доверливи документи од Белата Куќа на имотот на Трамп во Флорида.

Користејќи десетици шифрирани пораки, снимки и видео надзор, обвинителите го докажаа обвинението дека Роудс почнал да подготвува вооружен бунт веднаш по изборите во 2020 година за да го запре трансферот на власта.

За време на седум недели сведочење, поротата го слушна Роудс како ги повикува своите поддржувачи да се борат за да го одбранат Трамп, да разговараат за изгледите за „крвава“ граѓанска војна и да предупредат дека „Чуварите на заклетвата“ можеби ќе треба „да се кренат во оружје“ ако Трамп самиотн не дејствува.

Покрај Роудс, за виновна е прогласена и Кели Магс, лидерката на огранокот на „Чувари на заклетвата“ од Флорида. Три лица беа ослободени од ваквите обвиненија.

Немирите во зградата на Капитол, седиштето на американскиот Конгрес, избувнаа откако околу 2.000 поддржувачи на Доналд Трамп се собраа на 6 јануари 2021 година на протест кога истовремено и поранешниот претседател ги разгоре неоснованите тврдења дека претседателските избори биле со нерегуларности и кражби – што го предизвикале неговиот пораз.

Насилството резултираше со насилен упад во зградата на Конгресот, напади врз полицијата и членовите на највисокото американско законодавно тело – кои беа принудени да се кријат и да побегнат. Пет лица загинаа, а 140 полицајци беа ранети.

Процесот на потврдување на изборните резултати беше одложен, но не и откажан. На 6 јануари 2021 година, Конгресот ја потврди победата на актуелниот претседател Џо Бајден.

Тоа беше и единствениот случај во американската историја да не беше извршена мирна транзиција на власта меѓу поразениот и победникот на претседателските избори.

Извор: Вашингтон Пост/ Н1