Американско-руски самит во Женева меѓу очекувањата и можностите!

И покрај големата скепса кај голем број аналитичари и тинк-тенк организации, за тоа што би донела американско-руската средба на врвот што ќе се одржи во швајцарската метропола Женева во вилата ,,Ла Гранж“, не е мал бројот и на оние кои сметаат дека со самото тоа што претседателите Џо Бајден и Владимир Путин се среќаваат тет-а-тет, за почеток барем ќе ја испрати пораката дека и едната и другата страна, барем пред светот, си придаваат важност кога е во прашање кроењето на светската геостратегиска мапа.

Организаторите на средбата , се погрижиле во сè да има симболика што ќе праќа порака, па дури и во градот каде ќе се одржи средбата.

Во Женева далечната 1985 година беше состанокот меѓу тогашниот американски и руски претседател Роналд Реган и Михаил Горбачов, период познат како време на Студената војна.

Но како стојат денес работите? На денешниот состанок им претходеа неколку унилатерални акти од двете земји поединечно, што покажуваа дека ривалството на глобалната сцена не само што не престанало, туку и се засилува. Русија ги карактеризираа САД за непријателска земја, па следуваше протерување на дипломатите, а Бајден го нарече Путин ,,убиец“. САД заедно со НАТО ја сместуваат Русија во делот на ,,една од светските закани“. Сето ова како и анектирањето на Крим пред 6-7 години се сметаат за сплет на околности кои односите меѓу двете супер сили ги довело до амбис.

САД од денешниот состанок очекуват и посакуваат да видат подготвеност од Путин за стабилизирање и поголема предвидливост на односите во иднина.Рускиот претседател пак, на самитот доаѓа со очекувањето и убедувањето дека има ,,теми“ во светот на кои САД и Русија можат да соработуват заедно како контролата на нуклеарното вооружување , конфликтите во Либија и Сирија, климатските промени, за почеток сосема доволно, коментираат аналитичарите.

Украина иако толку посакувана тема за двајцата лидери, се очекува и двајцата вешто да ја избегнуваат на состанокот. Путин за да избегне вербален напад за кршење на човековите права дополнително, Бајден поради наводите за корупциски скандал во кој е осомничен неговиот син.

Но како врв на тој  почеток на враќање на довербата, ако е тоа воопшто можно, се очекува и двајцата претседатели да подадат рака барем во делот на враќање на дипломатите во амбасадите на двете земји. И оваа можност се очекува да е единственото нешто конкретно што ќе произлезе од состанокот.