Назив на домашна спортска федерација со придавката македонска пред описот на субјектот не е предвиден. Во обраќањето на Агенцијата за млади и спорт до националните спортски федерации и други правни лица што имаат решение за вршење на дејност спорт се оставени две опции за избор што е оставен на самите раководства. Едната гласи (спорт) федерација на Република Северна Македонија, втората е национална (спорт) федерација. Па така, на пример, Ракометната федерација на Македонија може да се преименува во Ракометна федерација на Република Северна Македонија или, пак, во национална ракометна федерација. 
Македонскиот олимписки комитет (МОК) е првата спортска организација со променет назив согласно новото уставно име на земјата. Референцата ФИРОМ за земјава на листата на членки на Интернационалниот олимписки комитет (ИОК) е заменета со Северна Македонија, а Олимпискиот комитет на ФИРОМ е запишан како Олимписки комитет на Северна Македонија. И од останатите меѓународни спортски асоцијации, во периодот што претстои, е за очекување да го следат примерот на ИОК во официјалната комуникација со овдешните партнери на кои, пак, од АМС се сугерира во најкус можен рок да интервенираат за промена на називите.
Македонската фудбалска репрезентација е последната во екипните спортови што забележа настап на меѓународна сцена како претставник на земја што во ФИФА и УЕФА е заведена како ФИР Македонија. Машката ракометна репрезентација, пак, се чини ќе биде прва во екипна конкуренција што во двомечот со Исланд за ЕП 2020 ќе претставува земја заведена како Северна Македонија во пописот на ИХФ и ЕХФ.