Македонскиот фудбалер, тренер и селектор Андон Дончевски е добитник на годинешната државна награда „8 септември“ за животно дело за исклучителни придонеси во развојот на спортот, афирмацијата и промоцијата на Македонија на меѓународен план.
Андон Дончевски (81 г.) е една од живите фудбалски легенди на Македонија, чие име е поврзано речиси сите позначајни датуми и остварувања на клупската и репрезентативната сцена.
Чичко Дончо , како што го нарекуваат помладите генерации е единствениот меѓу многубројните вардарови легенди, кој учествувал како играч и тренер, во освојувањето на двата најдрагоцени трофеи, во богатата историја на ФК Вардар.
Дончевски е роден на 19 ноември во 1935 година, и во дресот на Вардар настапува со успех цели 12 сезони, од 1953 до 1965 година. За најтрофејниот фудбалски клуб од територијата на Македонија, има одиграно вкупно 335 натпревари и настапено на 187 првенствени средби. Со своите 217 погодоци во дресот на Вардар, Дончевски се наоѓа чело на табелата на вечната листа на стрелци, како најдобар голгетер во историјата на клубот.
За својата долгогодишна играчка, тренерска и селекторска кариера, Дончевски го доби и признанието „спортски амбасадори“, заедно со Kирил Лазаров, Јошко Миленковски и Агим Ибраими.
Тој веќе подолго време живее во Австралија.
Освен Дончевски, оваа година признанија за остварувања во спортот ќе им се доделат и на Агим Ејупи, Фоти Ѓатовски, Добре Маринков и Сашко Поповски.