Дополнителниот-заменик министер во МВР, Оливер Андонов, смета дека министерот Оливер Спасовски самоволно ги направил 11-те измени на раководни функции и направил преседан.
– Техничкиот министер Спасовски на најгруб начин го девалвираше правниот систем и ги погази сите правни принципи врз кои е втемелена работата на министерството. Со еднострано потпишување на решенијата за распоредување на 11 лица вработени во МВР, Спасовски на најдобар начин покажа дека за него не постои Устав и закон туку само негов личен закон. Со измените, Спасовски се стави над законот и го доведе во прашање целокупниот систем на организација и работа во министерстовто во законски рамки, порача Андонов.
Според него, министерот Спасовски ги заобиколил на криминален начин правилата, процедурите и критериумите за распоредување и си дозволил да унапредува за три, четири се до 12 скалила во хиерархиската поставеност на МВР.
Со тоа, вели Андонов, станувала јасна намерата на Спасовски со министерството да раководи противзаконски, непрофесионално и самоволно вршејќи притисоци врз сите оние кои не мислаеле како него.
– Нема да дозволам со сиот мој кредибилитет, МВР да се претвори во партиски штаб…ќе ги искористам сите правни средства за запирање и санкционирање на ова досега невидено самоволие на Спасовски, и ќе придонесам кон враќање на владеењето на правото во МВР како еден од основните столбови на државата. Упатувам порака до сите дека прифаќањето на новите решенија се против законски и повлекува правни консеквенци, изјани Андонов меѓу другото на денешната прес-конференција.
Неговата реакција следува откако претходно Оливер Спасовски информираше дека направил 7 измени во секторите за внатрешни работи и 4 во други одделенија.
Ден по објавувањето на новиот случај „Трезор“, кој го отвори СЈО, тој разреши неколку раководни лица и на нивно место именуваше нови. Небојша Стајковиќ, кој раководеше со Одделот за информатика и телекомуникациии и кој осомничен за финансиски малверзации и злоупотреба на службена должност е заменет со Горан Трајановски.
Досегашниот началник на единицата Алфи пак, Ивица Анчевски е разрешен од страна на министерот и е именуван за дополнителен заменик на новиот началник на оваа единица – Примислав Димовски.