Девизниот курс на денарот останува стабилен и нема да има промени во неговото ниво, изјави гувернерката на Народната банка, Анита Ангеловска-Бежоска по седницата на Комитетот за финансиска стабилност.
Таа додаде дека централната банка располага со низа инструменти со кои ја гарантира стабилноста на денарот, а вчера на прес-конференцијата за економските мерки, напомена дека девизните резерви што се клучни за курсот на домашната валута се одржуваат на високо ниво, што е двојно повисоко од нивото пред глобалната економска криза во 2008 година.
„Заштедите на граѓаните во банките и штедилниците се сигурни и безбедни. Депозитите и сите други услуги што ги нудат овие финансиски институции, и натаму се достапни како и досега“, вели гувернерката.
Претходно, по одржувањето на седницата на Комитетот за финансиска стабилност, Народната банка и Министерството за финансии, заеднички соопштија дека банкарскиот систем е отпорен на потенцијалните шокови што е гаранција за одржување на финансиската стабилност во земјата.
Ангеловска-Бежоска напоменува дека тој е здраво и стабилно јадро во домашната економија. Во текот на вчерашниот ден се огласија и од Македонската банкарска асоцијација со потврда дека услугите на нивните членки – банките и штедилниците, за клиентите се достапни и по прогласувањето вонредна состојба.