Досега се издадени над 100.000 домашни платежни картички на граѓани во вредност од девет милиони евра, објави министерката за финансии, Нина Ангеловска на нејзиниот Фејсбук профил. Таа притоа нагласи дека матичните броеви на граѓаните кои поднеле приговори се проследени до институциите за проверка дали истите ги исполнуваат условите пропишани во Уредбата.

„Оние граѓани чии приговори ќе бидат прифатени по извршените проверки, ќе бидат додадени на листата со корисници на кои им следи поддршка и соодветно ќе бидат распределени во банките издавачи“, наведува министерката.

Банките, како што стои во објавата, забрзано работат на печатење и издавање на Домашна Платежна Картичка. Досега се персонализирани и испечатени над 250.000 картички, а до крајот на оваа недела ќе се испечатат и преостанатите картички што се предвидени со иницијалната листа.  Од следната недела, се очекува да се печатат и картичките по уважените приговори.