Долгот во последните три години е стабилизиран за разлика од периодот 2008-2016 година, кога нагло се зголемил за 23 проценти, е пораката што министерката за финансии, Нина Ангеловска ја испрати од денешната прес-конференција на која беше презентирана новата платформа преку која граѓаните ќе имаат можност за увид во состојбата на долгот на државата. Буџетот е во одлична кондиција, нагласи Ангеловска, и има одлична ликвидност и реализација во првиот месец, додавајќи дека планираното задолжување за годинава од 600 милиони евра е за раздолжување и за покривање на буџетскиот дефицит. Но, најважно, според неа, е дека јавниот долг се стабилизира и дека на тоа укажуваат и извештаите на меѓународните организации.
„Од 2008 година до 2016 година има зголемување за 23 проценти и ако беше употребено за развој и фискална мултипликација, верувам дека ќе имавме раст над пет проценти на БДП. Треба да внимаваме каде се вложуваат средствата што се земаат. Карикирање со бројки е лесно. Податоците покажуваат дека има години наназад кога долгот растел по 700-800 милиони евра. Домашно задолжување имало по 400 милини евра што сега е сведено на 200 милиони евра“, истакна Ангеловска, напоменувајќи дека планираното годинашно задолжување преку евробврзница од 500 милиони евра нема да се случи до изборите и дека се следат движењата на меѓународниот пазар.
Според министерката, не може да се очекува да не се задолжува земја во развој која треба значајно да инвестира во инфраструктура и да се развива.
„Зборуваме за значајни инвестиции и проекти кои се потребни за да постигнеме побрз развој и не може да карикираме само со апсолутни бројки од 300, 400 или 500 милиони евра задолжување. Треба да се има предвид и растот на економијата, односно доколку растот е поголем, секако дека процентот на јавниот долг како процент од БДП е релевантен показател и се споредува како расте, не во апсолутен износ, туку во споредба со економијата“, појасни Ангеловска.
Таа укажа на податоците дека зголемувањето на долгот во последните три години се должи на средства земени за поголеми проекти како за гасоводот (55 милиони евра), потоа за автопатите Миладиновци – Штип (76 милиони евра) и за Кичево – Охрид (120 милиоони евра), за надградба на патишта (21 милиони евра), за регионални и магистрални патишта (29 милинони евра), за развој на мали и средни претпријатија (44 милиони евра), итн. До крајот на годинава е планирано јавниот долг да достигне 50,4 проценти од БДП, што претставува 1,5 проценти раст.
Новата платформа нуди податоци за движење на долгот низ годините, за планирани задолжувања, раздолжувања, податоци за државните хартии од вредност, итн.