Министерката за финансии Нина Ангеловска е дел од Акциската група против ковид-19 основана од Светскиот економски форум. Антикризната платформа е основана како одговор на здравствените, на економските и на социјалните последици предизвикани од коронавирусот, треба да ги поврзе земјите и да ги поттикне заедно да дејствуваат со заедничка стратегија за сузбивање на глобалната криза, особено во периодот на опоравување.
Во акциската група членуваат 37 избрани вицепремиери, министри, високи функционери, универзитетски професори и истражувачи. Ангеловска е еден од 37. члена од Европа и од Азија. Групата ќе се состанува редовно со цел координација и проактивно дејствување.
„Акциската група треба да послужи како заедница на владите и стопанството и со брза реакција да се мобилизираат меѓурегионални акции за справување со повеќекратните ефекти на кризата предизвиката од ковид-19 во Европа и во Евроазија и заеднички да создаде стратегии за справување со последиците од кризата предизвикана од ковид-19. Целта, воедно, е да се подобри координацијата помеѓу властите, стопанството, невладините организации, академската јавност и другите засегнати страни, особено идентификувајќи ги можностите за меѓурегионална и меѓуиндустриска соработка“, појаснуваат од Министерството за финансии.
Групата треба да обезбеди и стратегиски совети со цел создавање на долгорочна одржливост на постојаните регионални проекти и тоа проектот на „Дигитална Европа“, „Европскиот Зелен Договор“ и „Стратешкиот дијалог за Западен Балкан“.