Македонија покажа дека не припаѓа во Д Лигата на нации, истакна меѓудругото селекторот Игор Ангеловски по убедливите 4:0 над Гибралтар во последното коло во групата 4 и освоеното прво место на табелата со 15 бода (пет победи и пораз). Предводникот на националниот тим не криеше задоволство од успешно исполнетата мисија и осигурената предност на домашен терен во полуфиналето против Белорусија или победникот од средбата меѓу Косово и Азербејџан во Приштина (вторник, 20.45 ч.).
„Најголеми заслуги за овој успех имаат фудбалерите. Нивната напорна работа во изминатиот период даде резултат. Првичната цел е исполнета. Наредната е пласман на Европското првенство во 2020 година“, рече Ангеловски по мечот со Гибралтар и заокружената кампања со 14 постигнати гола и пет примени.
И покрај позитивната резултатска низа на фудбалерите, сепак, на трибините на арената „Филип Втори“ имаше симболичен број на гледачи. Причини може да се бараат во студеното време или во неатрактивниот противник, но репрезентацијата несомнено заслужи поголема поддршка и посетеност на натпреварите во период во кој е во нагорен тренд според резултатите и играта.
„Сакам да останеме фоклусирани на нас. Верувам дека полуфиналето на домашен терен ќе привлече поголем интерес кај гледачите. Овие момци го заслужуваат тоа“, беше коментарот на селекторот.
Ангеловски не изрази особена желба за евентуалниот противник во полуфиналето меѓутоа истакна дека стручниот штаб и играчите остануваат силно посветени на целта што следува за историски пласман на завршен турнир во сениорска конкуренција.