Пресликување на добрите клупски настапи за подигрнување на нивото на игра на фудбалската репрезентација. Ова е желба на селекторот Игор Ангеловски што ја испорача при објавата на списокот за претстојните дуели против Израел на 2 септември во Хаифа и три дена подоцна со Албанија во Струмица во квалификациите за СП 2018 во Русија.
„Ми причинува особено задоволство што поголем дел од играчите се наоѓаат во посакувана форма. Несторовски и Трајковски се одлични во Палермо, Алиоски се наметнува како клучна алка во Лидс, Енис Барди, по подолго време, ги враќа македонските претставници во Примера. Се надевам дека нинивте клупски ангажмани, тренинзи и игри во клубовите ќе се преточат и во репрезентацијата и ќе бидат од големо значење за подигнување на нивото на игра“, истакна Ангеловски.
Списокот со 23 повикани репрезентативци јасно упатува на драстичното подмладување на националниот тим што како заложба го најави Ангеловски уште при неговото назначување на функцијата и особено го повторуваше при активностите на националниот тим во првата половина на 2017 година. Европското првенство за играчи до 21 година е минато, па селекторот широко ги отвори портите на сениорскиот тим за добар дел од генерацијата што ќе остане запишана со златни букви во аналите на македонската фудбалска историја.
Меѓу повиканите е Дејан Илиев, голман на Арсенал, кој се враќа во натпреварувачка форма по повредата. Покана за подготовки доби и Љупче Дориев од Академија Пандев, Дарко Велковски и Висар Муслиу од Вардар, Ѓоко Зајков од Шарлроа, Елиф Елмаз од Фенербахче, Енис Барди од Леванте. И сето тоа во функција на компонирање на селекција за долги патеки. По подолго време, поточно по три години, дефанзивната линија во националниот тим ќе биде без Ванче Шиков и Даниел Мојсов на стоперските позиции за кои Ангеловски, сепак, порачува дека не се избришани. За септемвриските мечеви го нема ниту Бесарт Ибраими од Шкендија, најдобриот стрелец во Прва лига за сезоната 2016/17.
„Она што го најавив уште првиот ден отсега започнуваме со реализација, а тоа е тим што долго време ќе игра заедно. Дени Илиев се враќа во натпреварувачки ритам и повикан е да му дадеме мотив плус за што поскоро враќање во препознатливата форма. Тој е наша голманска иднина. За одбраната се повикани фудбалери од златната генерација која имаше одлични квалификации за ЕП 2016 и одличен настап на самиот турнир во Полска. Верувам дека со Ристовски, Ристевски и Тошевски ќе можат адекватно да одговорат на задачите. Најмногу фудбалери ќе имаме за средниот ред. Два меча се пред нас и ќе биде потребна ротација“, додаде предводникот на фудбалските национали.
Собирот на фудбалерите е закажан на 28 август во Скопје. До натпреварот со Израелците се планирани пет тренинзи. Три во комплексот „Петар Милошевски“ при Фудбалската федерација на Македонија (ФФМ) и уште два по пристугнување во Хаифа (31 август и 1 септември).
Список на фудбалери за дуелот со Израел во квалификациите за СП 2018 во Русија
Голмани
Столе Димитриевски (Гимнастик/Шпанија)
Давид Митов Нилсон (Норчепинг/Шведска)
Дејан Илиев (Арсенал/Англија)
Одбрана
Стефан Ристовски (Спортинг Лисабон/Португалија)
Кире Ристевски (Вашаш/Унгарија)
Кристијан Тошевски (Пелистер)
Дарко Велковски (Вардар)
Ѓоко Зајков (Шарлроа/Белгија)
Висар Муслиу (Вардар)
Среден ред
Стефан Спировски (Вардар)
Ферхан Хасани (Шкендија)
Езџан Алиоски (Лидс/Англија)
Енис Барди (Леванте/Шпанија)
Бобан Николов (Вардар)
Давид Бабунски (Јокохама/Јапонија)
Љупчо Дориев (Академија Пандев)
Никола Ѓорѓев (Твенте/Холандија)
Елиф Елмаз (Фенербахче/Турција)
Напад
Горан Пандев (Џенова/Италија)
Илија Несторовски (Палермо/Италија)
Иван Тричковски (АЕК Ларнака/Кипар)
Александар Трајковски (Палермо/Италија)
Марјан Радески (Шкендија)