Комисијата за европски прашања во францускиот Парламент вечерва ќе заврши со интернет анкетата дали да се стави крај на летното и зимското сметање на времето и на кое сметање треба да се остане.
„Потребно ли е да ставиме крај на промената на времето (летно или зимско)“, гласи прашањето на анкетата што ќе биде затворена вечерва.
Според резултатите од советувањето, 84 отсто од испитаниците гласаа да се стави крај на промената на времето додека мнозинството е за останување зимското сметање на времето.
Слични се резултатите од испитувањата на јавното мислење и во другите земји членки на Европската Унија (ЕУ). На европско ниво, 84 проценти се изјаснија против менување на времето во летно или во зимско како што беше до 1976 година, 56 отсто сакаат да остане летното сметање, додека 36 проценти се „ЗА“ зимско сметање на времето.
Промената на времето е воведена во 1976 година и отсекогаш наидуваше на критики. Во септември 2018 година, претседателот на Европската комисија Жан-Клод Јункер, по консултација со неколку милиони европски граѓани, предложи во Европската унија да се прекине со промената на времето во зимско и летно сметање.
Последната промена на времето треба да биде на 1 април 2019 година. Но, европските министри за транспорт, на состанокот на 3 декември во 2018 година, ја разгледуваа можноста за напуштање на овој систем и термин да биде одреден дури во 2021 година. На крајот од координативното дејство, секоја земја-членка ќе мора да избере дали да остане на летно или зимско сметање на времето.