Фенербахче го претрпе петтиот пораз во Евролигата во оваа сезона. Тимот на Перо Антиќ загуби на домашен терен од Дарушафака со 64:71 (по четвртини: 18:20, 17:17, 13:13, 16:21) во 13 коло од елитното кошаркарско натпреварување. Македонскиот интернационалец одигра 20 минути и забележа седум поени (две тројки и едно слободно фрлање), четири скока и асистенција. Скоти Вилбекин со 22 поена и Вил Клајбурн со 20 ги предвода гостите со седмиот триумф, Слукас со 15 коша беше најефикасен соиграч на Антиќ.
Натпреварот во Истанбул донесе добра кошаркарска претстава, но и многу тензии на теренот. Крајот на првото полувреме го одбележа инцидент меѓу дел од актерите во двете екипи. Главните улоги ги поделија Скоти Вилбекин и Боби Диксон. Плејмејкерот на Фенербахче го удри со глава противничкиот играч, се замеша и Весели, па италијанскиот арбитар Луиџи Ламоника ја реши ситуацијата со тенички грешки за сите тројца за смирување на страстите. Единствено исклучен беше Морман кој од клупата на Дарушафака влезе на терен да дели правда.
Евролига
Резултати, 13. коло
Фенербахче – Дарушафака 64:71
Армани Милано – Панатинаикос 72:86
Макаби Тел Авив – ЦСКА Москва 76:80
Басконија – Барселона 65:62