Со одлука која беше донесена изненадувачки брзо, Советот на безбедност при Обединетите нации го избра поранешниот португалски премиер, Антонио Гутереш, за нов генерален секретар на ООН.
Во ретко видено единствено, 15-те амбасадори од Советот на безбедност соопштија дека по Бан Ки Мун со организацијата ќе раководи Гутереш кој мина и една декада како висок комесар за бегалци при ООН. Денеска, четврток, нивниот избор ќе биде и формализиран.
Веста вчеравечер ја соопшти рускиот амбасадор во ООН, Виталил Чуркин.
„Денеска, по серија гласања, имаме очигледен фаворит и неговото име е Антонио Гутереш“, рече рускиот амбасадор во ООН пред насобраните репортери во седиштето на организацијата во Њујорк.
Одлуката беше изненадувачка бидејќи многумина очекуваа процесот на селекција да трае дури до крајот на октомври поради големите сили кои се бореа да го промовираат нивниот фаворит. Некои дури мислеа дека Русија ќе го блокира Гутереш, а Москва и претходно рече дека би сакала да види личност од Источна Европа на највисоката функција во ООН.
„Мислам дека на крајот Русите сакаа одлуката да биде донесена за време на нивното претседателство и да можат да го убедат целиотСовет на безбедност да застане заедно и да демонстрира единство во време на толку длабоки поделби по толку многу прашања“, за британскиот „Гардијан“ коментира висок дипломатски извор од ООН.
Хуманитарец од акција
Додека траеше кампањата за нов шеф на ООН, Гутереш изјави дека новиот шеф треба да биде „олеснувач, чесен посредник и градител на мостови“ и апелираше на „зајакната дипломатија за мир“, односно за спречување на конфликтите и кризите со цел светот да не мора да се справува со последиците од нив.
За време на неговиот мандат во Високиот комесаријат за бегалци со седиште во Женева, Гутереш беше критичен кон односот на големите сили кон актуелната бегалска криза и изјави дека работата во таа организација не била„извонредна привилегија, туку страшно разочарување бидејќи недостига хуманитарно решение на нивните маки“. Тој успеа да ги зголеми активностите во оваа организација за три пати, а персоналот во Женева го намали за околу 20 проценти со цел да ги пренамени средствата во хуманитарни цели.
Антониот Гутереш има 67 години и тој ќе биде 9-тиот генерален секратар во историјата на организацијата. Роден е на 30 април, 1947 година во Лисабон, Португалија и по убедување е социјалист. Тој е побожен католик, а зборува и три јазици покрај мајчиниот португалски: англиски, француски и шпански. Има две деца, Маријана и Педро, а неговата сопруга починала од рак во 1998 година.