Апелациониот суд одлучи судијката Александра Поп Стефанија и натаму да остане во случајот „Тврдина“ и го отфрли барањето на Специјалното обвинителство кое бараше нејзино изземање од овој предмет. Жалбата на СЈО апелационите судии ја одбиле како неоснована.
Специјалното обвинителство на 23 јуни поднесе барање за изземање на Поп Стефанија како судија на претходна постапка во Основниот суд Скопје 1, која постапуваше по предлог на ова обвинителство за мерките за обезбедување присуство на осомничените во случајот „Тврдина“. СЈО прво поднесе жалба до Кривичниот суд, но откако беше одбиена, се жалеше и до повисокиот суд, но и Апелација ја одби жалбата.
Специјалното јавно обвинителство побара изземање на судијката Александра Поп Стефанија во случајот на уништување на опремата за прислушување, во кој осомничена е поранешната министерка Гордана Јанкулоска, која сега е вработена во Извршниот комитет на ВМРО-ДПМНЕ.
Со оглед на фактот што сопругот на Поп Стефанија е вработен во Општинскиот комитет на ВМРО-ДПМНЕ во Неготино, СЈО побара судијката да не го води овој случај.
СДСМ поднесе кривична пријава против истата судијка за несовесно и нестручно работење, а таква пријава доби и претседателот на судот Владимир Панчевски. Тие тврдат дека тој ја вработил Поп Стефанија спротивно на законите. Судскиот совет ја распределил во судот за прекршоци во Скопје, а Панчевски без одлука на Советот ја вработил во Кривичниот суд.
Сопруг на Поп Стефанија е Сашо Јанев, 34 годишен, член на Комисијата за лустрација и поранешен секретар на Општина Неготино и на ВМРО ДПМНЕ од Неготино. Во Комисијата за лустрација бил избран во последниот состав од 2014 година.
Судијката поп Стефанија има релации и со пратеникот Павле Саздов од ВМРО ДПМНЕ, кој и е зет за братучетка.