Апелација го одби барањето на одбраната на Никола Груевски за изземање на специјалната јавна обвинителка, Катица Јанева како неосновано, по што продолжи јавната седница во второстепениот суд.
Судијката-известител Тања Милева рече дека за овој предмет на СЈО познат под кодното име „Тенк“, биле поднесени вкупно 6 жалби, од кои 4 на адвокатите на Груевски, една лично од него, и уште една од Ѓоко Поповски.
Во жалбените наоди на адвокатите е наведено дека судот направил серија суштествени повреди на Законот за кривична постапка, и дека погрешно ја утврдил фактичката состојба.
Во жалбата пишува дека судот против-законски ги одбил барањата на адвокатите за изземање на судиите и поротниците и дека СЈО пред судот не ја докажало надлежноста. Освен тоа, наведено е дека дел од доказите биле доставени во копија, а Груевски и неговите адвокати воопшто не ги добил бомбите како докази. Записниците од седниците за судењата не кореспондирале со видео-записите од судскиот процес. Обвинетиот се жали за вештачењата на СЈО, кои, како што пишува во жалбата, вештачеле со истечени лиценци. Адвокатите се жалат дека не бил доставен записник за примопредвање на бомбите.
Во жалбата се додава дека во февруари годинава настапила апсолутна застареност на кривичното дело, поради телефонскиот разговор кој Груевски го направил на 26 февруари 2012 година. Во образложението на жалбите е наведено дека пресудата е нејасна и противречна.
Поради ова се бара укинување на првостепената пресуда и судот да донесе ослободителна пресуда.
На седницата не присуствуваат Груевски, како и неговите бранители Димитар Дангов, Сања Алексиќ, Данчо Анаков и Боро Тасевски, кои го известиле Судот дека се спречени да дојдат бидејќи се ангажирани на други предмети во Кривичниот суд. Ѓоко Поповски и неговите адвокати дојдоа во Апелацискиот суд.
Пред судот има полициско обезбедување, а има и граѓани кои протестираат.
Груевски вчера на прес конференција рече дека ниту тој ниту неговите адвокати нема да дојдат на денешната јавна седница на Апелација и обвини дека судовите носат одлуки под политички притисок и дека судот веќе решил да му одреди казна затвор.
За случајот „Тенк“, односно за набавката на лускузниот „мерцедес“ вреден 600 илјади евра, поранешниот премиер Никола Груевски како поттикнувач за извршување на делото е осуден на две години затвор, а поранешниот помошник министер во МВР Ѓоко Поповски на шест години и шест месеци затвор.
Во Кривичниот суд во Скопје за „Тенк“ се води и раздвоена постапка против поранешната министерка за внатрешни работи Гордана Јанкулоска.