Дваесет и деветгодишен арачиновец вчера успеал да го надитри судијата, обезбедувањето во Кривичниот суд и полицајците кои го привеле и им избегал. МВР соопшти дека брзиот арачиновец, со писмена наредба бил донесен во судот вчера околу 10 часот во канцеларија на судија за итен притвор.
Откако судијата ја потпишал наредбата и полициските службеници излегле надвор пред канцеларијата, А.Б искористил згодна прилика и избегал, односно скокнал преку отворениот прозор од канцеларијата. Инаку арачиновецот секој понеделник се јавувал во судот во врска со случај за „криумчарење мигранти“.
По оваа верзија на настанот што ја објави МВР во денешниот билтен, со демант се јави Кривичниот суд. Според судот, осомничениот воопшто не влегол во кабинетот на судијата. Бил спроведен во скопскиот суд од страна на двајца полициски службеници на МВР, кои го оставиле сам пред вратата на судијата и излегле надвор.
„Осомничениот по своја волја излегол надвор низ предниот влез на судот и заминал во непознат правец.
Судската полиција не е задолжена за обезбедување на лицата кои се носат по наредба за спровод, па оттука појаснуваме дека пропустот е кај полициските службеници на МВР“, соопштија од Кривичниот суд во Скопје.