Арсенал одлета за Баку каде во среда вечер (21 ч.) ќе игра против Челзи за трофејот во Лига Европа. на списокот на патници на менаџерот Унаи Емери се најде и македонскиот репрезентативен голман, Дејан Илиев како и Мезут Озил, Дани Велбек и Гранит Џака, но не и Хенрик Мкитарјан чие отсуство ќе претставува хендикеп за „топчиите“ против „сините“ на Маурисио Сари на националниот стадион во главниот град на Азербејџан. Ерменецот остана во Лондон бидејќи не можеше да му се гарантира безбедност во земјата што е одамна во конфликт со неговата и со прекинати дипломатски односи од 1994 година.
Одлуката за градот домаќин на финалето, пак, се заканува да биде една од најлошите во историјата на Европската фудбалска асоцијација (УЕФА). Јавноста негодуваше уште од денот на изборот, а како се доближува мечот, најавите стануваат алармантни од аспект на исполнетоста на капацитетот на стадионот во Баку. Моментната ситуација упатува дека новиот освојувач во второто по ранг натпреварување на УЕФА ќе биде промовиран пред полупразни трибини.
На оддалеченоста на Баку од Лондон реагираат и клубовите, но и нивните навивачи. Градските ривали од Премиерлигата добија по 6.000 влезници за продажба меѓутоа неофицијално, пола ќе вратат на УЕФА. До денеска Арсенал продаде 3.500 билети, а Челзи 2.000. Причина се преку 4.000 километри што треба да се минат до Баку и трошоците што се високи и за англиските навивачи.