По вчерашната одлука за разрешување на директорот на јавното претпријатие Комунална хигиена кој беше директно поврзан со лицето кое пукаше на протестот организиран од страна на ВМРО ДПМНЕ, попладнево со своја изјава за медиумите се огласи градоначалничката на Скопје, Данела Арсовска.
Таа вели дека не ја разбира вообразеноста и коментарите на Таравари, со оглед на тоа што соработката е завршена уште вчера.
Кадровски решенија може тој лично да си поставува во Гостивар, а не во Скопје, вели Арсовска и додава дека со личност која напаѓа, која нема етички компас, оправдува во било која форма насилство и напад со огнено оружје како во вчерашниот инцидент и подгрева меѓуетнички тензии, нема основ да се соработува.
Скопје е град на соживот, солидарност, во кој нашите сограѓани треба мирно и безбедно да живеат и да се почитуваат, заклучува Арсовска во изјавата. (Р.Н.)
