Помина еден месец од законските измени и сè уште нема никаков прогрес во однос на набавка на лекот „Трикафта“, реагираа денеска претставници на Асоцијација за цистична фиброза.
Тие на денешната прес-конференција пред Министерството за здравство побараа поголема ажурност од страна на надлежните институции.
„Тоа што го знаеме иако официјално не сме поканети на било каков состанок со Министерството и со другите надлежни институции, е дека тие имаат одредена комисија што ја формираат со доста бавно темпо, незадоволително на тоа што очекувавме дека ќе се формира“, изјави Фики Гаспар, еден од членовите на Асоцијацијата.
Од Асоцијацијата информираа дека воопшто не е воспоставен контакт со потребната компанија, а не се работи ниту на програмата за обезбедување на лекот за останатите пациенти.
„Ние пред 10 дена испративме официјален мејл до сите надлежни кои се опфатени со оваа работа, тоа се Фондот, Министерството за здравство и претставниците на Владата кои се во таа здравствена Комисија, но се уште после 10 дена немаме добиено одговор“, истакна Гаспар.
Од Асоцијацијата велат дека смртниот случај што предизвика бура реакции во јавноста и медиумите резултирал со набавка на лек за најкритичните болни, но сметаат дека откако јавноста се смирила немало никаков прогрес во постапката за набавка на лекот.
„Нашето чувство и чувството на членството е дека овие дванаесет пациенти кои го добија лекот и покажуваат резултати беше само со цел да се смири јавноста, медиумите, за да може да се одложи процесот. Не сме разговарале за програмата немаат известено дали од економски аспект пронашле начин како ќе се финансира овој лек и немаме никаков план и програма од нивна страна за тоа со кое темпо ќе се добива и како ќе се спроведува давањето на лекот на останатите пациенти. Мислам дека и во јавноста се појави една слика дека сме ја завршиле работата, но сме далеку од тоа, иако поминаа законските измени на кои инсистиравме и наводно кои беа пречка, но еве после месец дена нема никаков прогрес, а ни беше ветено дека за многу брзо време сите пациенти ќе примаат „Трикафта“, посочи Гаспар.
Најавија протест доколку состојбата околу набавката на лекот остане непроменета.
Велат дека вкупно 140 лица се погодени од болеста цистична фиброза, но дека не може да се одреди колку лица се во критична состојба затоа што параметрите се менуваат постојано.
„Вкупно сме 140, и некои веќе не известија дека влегуваат во таа критична состојба кој што е под 40 посто функционалност на органите, иако пред тоа кога почнаваме со целата работа пред два три месеци беа со над 50, 60 проценти функционалност. Но не може да се зборува со сигурност, бидејќи параметрите се менуваат“, појасни Гаспар.
Извор: МИА