На продолжението на судењето за настаните од 27 април, сведочеше тогашниот пратеник, сега заменик министер за образование Петар Атанасов.

Тој меѓудругото кажа дека некои од пратениците од тогашниот состав со недели претходно им се заканувале на пратениците на СДСМ од говорницата, велејќи им дека народот ќе ги земе работите во свои раце.

-Најсугестивен во своите закани беше пратеникот Крсто Мускоски, а и најагресивно се однесуваше. Заканите кон нас беа со недели претходно, дека пред Собранието има илјада луѓе кои стојат на дистанца и за 20 минути се додаваат групи на луѓе кои ги гледавме во Собранието. Оваа приказна ми личи дека има поврзаност- кој наредувал, што треба да е случи. Кој е креатарот, јас не знам, рече Атанасов.

Тој сведочепе што видел за време на крвавиот четврток и според него, цела ситуација му наликувала како целта да била физичко онеспособвање на Зоран Заев, па дури и негова ликвидација.

-Влегоа во прес салата. Веднаш се забележа дека беа насочени кон Заев. Тој стоеше во средината на салата, јас бев од левата страна. Бев турнат, но успеав да се исправам и во тој момент беше повредена една од пратеничките. Се обидов да и помогнам, рече Атанасов.

На прашање на одбраната на обвинетиот Влатко Трајковски дали го препознава него дека му помогнал да ја изнесат повредена пратеничка, тој рече дека Трајковски личи на човекот кој вечерта го видел, но не може со сигурност да потврди бидејќи многу кратко го видел.

Рочиштето продолжува со сведочењата на Катерина Кузмановска и Хари Локвенец.

Претходно денеска сведочеше и пратеникот од Партијата  за движење на Турците, Енес Ибрахим кој во детали опишуваше што се случувало ноќта за време на крвавиот четрвток.