Јусеин Болт се прости од настапите во својата родна Јамајка. На специјалниот настан под назив „Поздрав за легендата“, најбрзиот човек на планетата ја истрча последната трка на 100 метри на националниот стадион во Кингстон пред повеќе од 30.000 гледачи. Беше дочекан и поздравен како државник, а во обраќањето до присутните на трибините и крај ТВ екраните, не можеше да го сокрие емоциите.
„Никогаш во кариерата не сум бил понервозен пред една трка. За некого можеби е само една трка, за мене ова беше посебна. Уште од јуниорските денови имав неверојатна поддршка од својата држава. Без родителите, пријателите и Ен Џеј, мојот најдобр другар, немаше ништо да постигнам“, рече Болт кој најави дека ќе се повлече од атлетиката по Светското првенство во август оваа година.
Легендарниот спринтер е на залез на кариерата. Како цел што ја постави пред себе е само атлетскиот мундијал во Лондон. Ќе замине во пензија како сопственик на бројни медали, трофеи, рекорди и резултати што тешко дека ќе бидат достигнати во скора иднина. На последните три Олимпијади во Пекинг во 2008 година, во Лондон во 2012 година и од Рио де Жанеиро во 2016 година беше неприкосновен во трките на 100 метри, на 200 метри и во штафетната 4х100 метри.
„Голема благодарност до Јамајка, вакво нешто не очекував. Навистина е прекрасно чувството што толку луѓе дојдоа да ме видат и поздрават. Тоа доволно говори дека го ценат она што сум го правел и ми претставува чест што е така“, додаде спортскиот херој на Јамајка кој, патем, победи во прошталниот настап пред своите сонародници со време 10,03 секунди.