Интернационалната атлетска федерација (ИААФ) дозволи настап на руски атлетичари на Светското првенство во Лондон, но притоа пропиша строги правила на однесување. Нивната експедиција ќе брои вкупно 19 спортисти кои ќе се натпреваруваат како неутрални, без химна и национални бои. Враќањето на Русија на меѓународната атлетска сцена доаѓа по две години од суспензијата поради допинг и една година по Игрите во Рио де Жанеиро во кои имаше само еден претставник.
„Ги имам речиси сите права што некогаш ги имав“, вели Сергеј Шубенков, носител на златен медал од атлетскиот мундијал во 2015 година.
Во категоријата „забрането“ е руската химна и националните бои, а ИААФ ќе треба да даде одобрение и за спортската опрема во неутрални бои. Белата, црвената и сината се забранети и на накит, завои, ленти, итн. Во случај да освојат злато, при прогласување на најдобрите ќе биде интонирана химната на ИААФ, а се предвидени казни доколку некој ја пее руската химна.
„Правилата се малку смешни“, додаде Шубенков.
Како кандидат за најсјајниот медал во Лондон, покрај Шубенков, важи и Марија Ласицкене кој ќе учествува во скок во височина. За допинг скандалот што ја погоди руската атлетика не сака да говори и сака што поскоро да го заборави.
„Не сакам да трошам емоции на тоа. Ми требаат за натпреварот“, рече Ласицкене.
Истрагите и „прогонот“ што траеше повеќе од две години ги сплотил и ги направил посилни атлетичарите од Русија.
„Меѓусебно се поддржуваме и ќе продолжиме така. Како никогаш досега сме пријатели“, порача Анжелика Сидорова која во Лондон ќе атакува на највисок пласман во скок со стап.
Светското атлетско првенство во Лондон ќе почне на 4 август и ќе трае до 13 август.