Во случај да го освојат трофејот на Светското клупско првенство во Јапонија, фудбалерите на Атлетико насионал од Меделин ќе го посветат на загинатите членови на бразилски Шапекоенсе. Правото на учество на турнирот во Токио, колумбискиот состав го обезбеди во јули го триумфот во Копа Либертадорес, а утре претпладне во 11.30 часот по средноевропско време против домашната екипа Кашима антлерс што веќе ги елиминира Оукленд (Австралија) и Мамелоди (Африка).

„Овие неколку недели беа навистина тешки. Шапекоенсе ги чувствуваме како наши браќа. Мора да го освоиме турнирот за нив“, изјави Реиналдо Руеда, тренер на Атлетико, пред полуфиналето.

Атлетико национал требаше да игра финале и во Копа Судамерикана против Шапекоенсе. Но, авионот што го превезуваше бразилскиот клуб се урна крај Меделин, па мечот за титулата беше откажан. На иницијатива на Колумбијците, трофејот му беше доделен на клубот од Шапеко што ќе игра во наредното издание на Копа Либертадорес и во јужноамериканскиот Суперкуп.

„Се случи голема трагедија. Затоа сакаме да одадеме почест на жртвите со освојување на трофејот и да им го однесеме дома“, вели фудбалерот на Атлетико Н, Фелипе Агилар.

Во второто полуфинале ќе играат Клуб Америка од Мексико и Реал Мадрид.