Два златни медала за Русија и еден за Етиопија е епилогот по трите финални дисциплини на 17. Светско првенство во сала во Бирмингам.
Данил Лисенко ја покори конкуренцијата во скок во височина во машка конкуренција. До најсјајното одличје тој стигна со прескокнати 2,36 метри. Второто место го освои Мутаз Еса Баршим од Катар (2,33 метри), бронзата му припадна на Германецот Матеуж Прзибилко (2,29 метри).
Во истата дисциплина кај девојките триумфира сонародничката на Лисенко, Марија Ласицкене со резултат 2,01 метри пред Вашти Канингам од САД (1,93 метри) и Италијанката Алесија Трост (1,93 метри).
Лисенко и Ласицкене настапија под знамето на Интернационалната атлетска федерација (ИААФ).
Гензебе Дибаба, пак, победи во женската трка на 3,000 метри. Времето со кое Етиопјанката мина низ целта беше 8:45,05 минути. Сребрениот медал блесна на градите на Сифан Хасан од Холандија (8:45,68 минути) додека бронзениот го резервира Лора Муир од Велика Британија (8:45,78 минути).
Македонија има еден претставник на СП во сала во Бирмингам што почна вчера и ќе трае до недела. Дарио Ивановски ќе настапи во квалификациската трка на 1,500 метри што е закажана за утре напладне (12,15 часот).