Двапати меѓусебно играа на Светските првенства во футсал во 2012 година и во 2016 година, во 2014 година се судрија и интернационален турнир на песок, а попладнево (17 ч.) на „Крестовски“ стадионот во Санкт Петербург, Мароко и Иран за првпат во историјата ќе се пресметаат и на трева.
Мароканците се горди што нивното знаме повторно се вее на мундијалската сцена, момент што го чекаа од 1998 година и турнирот во Франција. Горди се и на својата фудбалска репрезентација која 18 меча е без пораз. Со подолга низа од нив во Русија пристигнаа само Белгија (19) и Шпанија (20). Трендот очекуваат и посакуваат да продолжи и во премиерата на СП 2018 и со три бода да ги дочекаат преостанатите дуели во групната фаза против фаворизираните Португалија и Шпанија. Имаат и адути притоа што ги лоцираат во два сегмента од играта – колективото и, особено, одбраната која е единствена што не прими ниту еден гол во квалификациите.
Со оглед на пиринејските ривали што ќе следуваат, мечот со Мароко е клучен за амбициите во групата Б и за Иранците. Мотивите и кај нив се големи во петтото учество на Светските првенства, но пласманот во нокаут фазата е сè уште сон за нивните фанови. Во моментот кога обезбедија виза за Русија помислија дека, конечно, ќе можат до осминафинале меѓутоа таквата мисија стана ѓаволки тешка за нив по ждрепката. Селекторот Карлос Квеирош не може да смета на суспендираниот Саид Езатолахи и, истовремено, загрижен за повредите на Мехди Тареми и на Ашкан Дејага.