Лина Ѓорческа остана без учество на главниот турнир на Австралија опен. По двете историски гренслем победи против Американката Викери (6:3, 3:6, 6:3) во првото коло и Унгарката Далма Галфи (6:1, 6:1) во второто, најдобрата македонска тенисерка е запрена во финалниот квалификациски во Мелбурн парк.
Подобра од неа беше Стефани Фогел од Швајцарија, прва носителка меѓу квалификантките, со 4:6, 6:3, 6:2 (нејзин трет меч во три сета) и во првото коло ќе игра против Куруми Нара од Јапонија. Ѓорческа, сепак, одигра квалитетен настап на теренот со малерозна бројка 13 (со Викери и Галфи играше на 22) и даде силен отпор на четири години повозрасната противничка.
Направи брејк во третиот гем и успеа да го потврди во наредниот на својот сервис што беше доволно за освојување на сетот за водство со 1:0. Фогел го имаше почетниот удар и во вториот сет. Го задржа својот сервис и го освои на Ѓорческа за предност со 2:0. Веќе во следните два Лина возврати и воспостави резултатска рамнотежа (2:2). Швајцарката направи нов брејк во осмиот гем за водство со 5:3 што не ги испушти за 6:3 и израмнување на 1:1.
Ѓорческа како што посакуваше го почна решавачкиот сет. Поведе со 2:0 со брејк предност и одеднаш запре. Фогел направи серија со 6:0 за конечни 6:2 за конечни 2:1 по еден час и 54 минути игра.
Бројките од натпреварот покажуваат дека Ѓорческа беше рамноправна и на моменти подобра на теренот. Запиша три аса Фогел ниту еден во мечот без двојни сервис грешки. Презицноста на првиот сервис беше речиси израмнета и беше подеднакво оружје за двете. Македонската тенисерка имаше 65 отсто влезност на почетниот удар, Швајцарската, пак, 67. Но, она што беше драстично на страна на Фогел беа освоените поени по втор сервис.
Ѓорческа не успеа до елитата меѓутоа покажа дека 2017 година ќе биде добра за неа. Ова беше нејзино само второ учество во квалификации за гренслем турнир во кои има скор од 2-2. Лани беше поразена уште во првото коло од Катрин Белис во Њујорк (6:0, 6:2), за Австралија опен ги еллиминира Викери и Галфи пред поразот од Фогел.