Ниту повредата ниту паузата се чувствуваат во играта на Рафаел Надал на Австралија опен. Шпанецот беспрекорно го одработи и третиот настап во Мелбурн и со убедлив триумф (6:1, 6:3, 6:1) над Дамир Џумхур од БиХ се пласира во четвртото коло на првиот гренслем во 2018 година. По мечот изрази задоволство од сопствениот перформанс, но и забелешки на временските услови за игра на турнирот.
„Одличен меч. Кога ќе победите со 6:1, 6:3, 6:1 во трето коло на гренслем турнир, тоа е подразбира дека е добар резултат што прави да бидете задоволен. А, тоа е невозможно без добра игра. Подготовките и за овој натпревар беа вообичаени. Се разбудив, отидов во теретана, се загревав, потоа на терен, па на ручек, малку видео игри и тоа е тоа“, рече Надал по победата над 28 носител на турнирот.
Како за останатите тенисер(к)и, така и за Надал, временските прилики во Мелбурн се голем проблем и бараат натчовечки напори да се издржи и истовремено да се остане фокусиран и на играта и на противниците кога живата во термометарот се искачува и до 40. степен.
„Во некои денови е едноставно премногу. Може да биде штетно по здравје што не е шега. Глетката на мачење на тенисери на терен воопшто не е пријатна. Позитивна работа под пеколното сонце е воздухот што за среќа беше сув, а не влажен како што беше случај во Рио де Жанеиро. И тоа прави голема разлика“, додаде прворангираниот тенисер во Мелбурн парк кој за место во четврт-финале ќе игра против Аргентинецот Диего Шварцман.
Цонга: Нека се симне долу, ќе му покажам
Мечот меѓу Ник Кирјос и Жо Вилфред Цонга беше дерби во петтиот натпреварувачки ден во Мелбурн. Очекувањата одеа во насока на тензичен меч имајќи го предвид темпераментот на двајцата тенисери. Тензија не изостана, но, сепак, не меѓу актерите на теренот туку меѓу Французинот и гледач на трибините на почетокот на четвртиот сет. Цонга беше силно испровоциран, па влезе во нервозна конверзација со судијата да преземе нешто, во спротивно му порача „да се симне долу и да му покаже самиот“. Тоа на крајот го чинеше поразот од Австралиецот со 7:6, 4:6, 7:6, 7:6.
„Донесете ми го овде, ќе го разнесам. Ми рече нешто, а јас ќе направам тоа што сакам“, бесно дофрли Цонга кон судијата на стол за подоцна да почне нервозно да гестикулира и кон несовесниот гледач да се симне на терен.
По шампионката на Вимблдон, елиминирана и освојувачката на Ролан Гарос, Остапенко
Јелена Остапенко, сензационалната победничка на Ролан Гарос во 2017 година, не успеа до осминафинале на Австралија опен. Анет Контавеит од Естонија беше подобра од Летонката со 6:3, 1:6, 6:3 со што си обезбеди меч против шпанската ветеранка Карла Суарез Наваро во наредната рунда. Со елиминацијата претходно се соочи и шампионката на Вимблдон, Гарбиње Мугуруза која загуби од Хсие од Тајпеј (6:7, 4:6).
Пласман во осминафинале осигура Каролина Возњацки. Данската тенисерка, втора носителка во Мелбурн, славеше над Кики Бертенс од Холандија со 6:4, 6:3 и за пробивање меѓу осумте најдобри на турнирот ја очекува судир со Магдалена Рибарикова од Словачка.
Лесен триумф и за четвртата носителка, Елина Свитолина од Украина која со 6:2, 6:2 ја доби сонародничката Марта Костјук.
Австралија опен
Мажи, 3 коло
Надал (1., Шпанија) – Џумхур (28., БиХ) 6:1, 6:3, 6:1
Димитров (3., Бугарија) – Рублев (Русија) 6:3, 4:6, 6:4, 6:4
Чилиќ (6., Хрватска) – Харисон (САД) 7:6, 6:3, 7:6
Карењо Буста (10., Шпанија) – Милер (23., Луксембург) 7:6, 4:6, 7:5, 7:5
Кирјос (17., Австралија) – Цонга (15., Франција) 7:6, 4:6, 7:6, 7:6
Шварцман (24., Аргентина) – Долгополов (Украина) 6:7, 6:2, 6:3, 6:3
Сепи (Италија) – Карловиќ (Хрватска) 6:3, 7:6, 6:7, 6:7, 9:7
Едмунд (В. Британија) – Басилашвили (Грузија) 7:6, 3:6, 4:6, 6:0, 7:5
Жени, 3 коло
Возњацки (2., Данска) – Бертенс (30., Холандија) 6:4, 6:3
Свитолина (4., Украина) – Костјук (Украина) 6:2, 6:2
Рибарикова (30., Словачка) – Бондаренко (Украина) 7:5, 3:6, 6:1
Контавеит (32., Естонија) – Остапенко (7., Летонија) 6:3, 1:6, 6:3
Мартиќ (Хрватска) – Кумкум (Тајланд) 6:3, 3:6, 7:5
Алертова (Чешка) – Линете (Полска) 6:1, 6:4
Мертенс (Белгија) – Корне (Франција) 7:5, 6:4
Суарез Наваро (Шпанија) – Канепи (Естонија) 3:6, 6:1, 6:3