Австрија има намера да воведе „затворање“ за граѓаните кои не се вакцинирани против ковид-19 уште од недела на полноќ, а тоа ќе биде на сила до 24-ти ноември. Нацрт-предлогот, во кој увид имала германската новинска агенција DPA, истакнува дека се потребни интервенции за да се „спречи распадот на здравствениот систем“.
Доколку „затворањето“ биде воведено, лицата кои не се вакцинирани или не прележале Ковид нема да смеат да ги напуштаат своите домови, освен во одредени околности. Од прописот би требало да бидат изземени граѓаните кои вршат неопходни работи – кои одат на работа, излегуваат поради сопственото телесно и душевно здравје, или поради „основани верски потреби“. Затворањето не се однесува на децата помлади од 12 години.
Австрија во саботата потврди повеќе од 13.000 нови случаи на зараза со коронавирусот, што е досега најголем број нови корона-инфекции во земјата. Неделната инциденца, односно зачестеноста на заразата со коронавирусот на 100.000 луѓе се зголемила на 814,6.
Вакви бројки се регистрираат само неколку дена откако Австрија веќе ги заостри мерките за справување со четвртиот бран на епидемијата, како што е воведување на забраната за пристап до поголемите јавни простори за оние кои сѐ уште не се вакцинирале.