За Словачка проширувањето кон Балканот е важен приоритет. Оваа земја претседава со ЕУ до крајот на оваа година. За да покаже дека проширувањето е вистински приоритет, Братислава одлучи својата прва конференција во Брисел да му ја посвети токму на овој процес.
Државниот секретар во Министерството за надворешни работи Иван Корчак на конференцијата во Брисел вчера изјави дека ЕУ мора да ја зајакне својата глобална улога во светот но дека тоа не може да се направи без стабилизирање на првите европски соседи – балканските земји.
Иван Корчак
Словачкотo претседателство, на сесијата на шефовите на ЕУ дипломатиите, на дело покажа дека проширувањето му лежи на срце па денес во Брисел министрите и наложија на Европската комисија (ЕК) без одлагање да го даде своето мислење на барањето на Босна и Херцеговина да стане член на ЕУ.
Се очекува дека ова ќе биде направено во моментот кога ќе бидат објавени извештаите за балканските земји на 9 ноември.
Извештаите се се уште во подготовка а НОВА дознава дека македонскиот извештај ќе биде негативен и нема да штеди остри зборови за сите минатогодишни политички авантури.
Во Брисел и во другите ЕУ престолнини одамна се тврди дека Европа е заморена од проширувањето. Но, Словаците сфатија дека и Балканот е заморен од не-проширувањето. Според словачкиот аналитичар Томаж Стражеј, кој за НОВА направи куса анализа на овој феномен, колку и да се избегнува проширувањето на состаноците на ЕУ од тоа не може да се избега.