Новороденче кое починало четири дена по неговото раѓање во 2015 година се уште се води дека е живо во Управата за водење на матични книги.

Ова за НОВА го потврдија од Министерството за правда, откако побаравме одговор која е причината што семејството добива покани за вакцинација, а во мај годинава им пристигнала и Покана за да го запишат на училиште, во прво одделение.

Семејството Стојаноски од Прилеп е во шок откога добиле Покана за да го запишат нивното починато бебе на училиште. Во Поканата стои дека треба да дојдат во ОУ„Рампо Левката’, за да го запишат во прво одделение во учебната 2020/2021 година.

„Не знам што се случува со овој систем кој повремено копа по мојата најголема рана. Покрај болката за него во овие пет години, мора ли да бидеме изложени и на ваква траума. Не знаеме дали нашиот син Даријан е во системот на починати и каде е настанат проблемот. Ова е само дополнителен стрес за нас како родители“, со растреперен глас објаснува за НОВА, Мери Стојаноска, мајка на починатото бебе.

НОВА побара одговор во МВР, каде го проверија случајот и не упатија во Управата за водење на Матичи книги при Министерството за правда. Од таму не информираа дека неговата смрт не е евидентирана и бебето се води дека е живо.

„Никаква пријава за смрт не е евидентирана во системот на Управата за водење на матични книги. Тоа значи дека смртта не е пријавена воопшто ниту од институцијата каде што починало (Клиниката за детски болести), ниту по приватна линија“, потврдија за НОВА, од Министерството за правда.

Од ресорното Министерство посочија дека сега треба да се поднесе барање заедно со Изводот на родени(кој семејството  уште тогаш го извадиле) и доказот за смртта и тоа може да се направи и електронски.

„Доколку починало во болница, самата болница пријавува. Барем така е сега. Исто така, барање можело да достави и некој од семјството или пријател, но никој не го сторил тоа,“ велат од Министерството за правда.

Но, семејството тврди дека не е така. Тие се уверени дека некој потфрлил во случајот. Прашуваат каде настанала системската грешка бидејќи нивниот роднина(вујко) кој земал Потврда за смртта од Детска клиника го доставил документот заедно со Изводот од матична книга на родени.

„Вујко ми го зема документот, тоа е потврдата за смртта од Детска клиника и ја достави заедно со препис од Изводот на родени кои моравме да го извадиме за да ја пријавиме смртта. Службеничката му ги примила документите и му кажала дека се во ред, дека се преземени од нивна страна и ќе биде заведена смртта, но доколку сакаме посмртница треба лично родителот да дојде и да си ја земе. Служеничката ја задржала белешката за смртта од клиниката, од каде сега ние да бараме друга. Повторно ли треба да поминуваме низ трауми“, вели во шок Мери Стојаноска.

На Клиниката за детски болести пак, велат дека немаат обврска да ја пријават смртта на бебето. Тие издале потврда за смртта која ја подигнал близок роднина на семејството.

„Новородено машко на мајка С.М. – Прилеп. Хоспитализирано на 26.01.2015 со матичен број на историја на болен 492/2015г. Починало на 30.01.2015 година. Детето е уредно испишано административно. Потврдата за починато лице е подигната од вујко на детето, за што постои своерачен потпис. Родителот одбил обдукција“, се вели во одговорот од Клиниката за детски болести.

Семејството Стојаноски е во шок по ваквите одговори на институциите. Сега веќе не знаат ниту каде да се обратат, ниту што да прават. Тие бараат само да престанат да им праќаат покани за починатото дете.

За разлика од Детска клиника каде што тврдат дека е заведено дека родителот одбил обдукција, Стојаноска тврди дека е направена обдукција, а наодот го достави до НОВА.

„Обдукција е направена, а на наодот чекавме малку подолго и го имаме. Но, ова што детето се води како живо не знам што да кажам. Во шок сум. Ова е огромен пропуст. Не знам веќе ниту на кого да се обратам, на кого да кажам, на кого да верувам. Само барам да не ни стигаат повеќе покани за вакцини, за во училиште, зашто тоа е огромен психолошки притисок“, вели Стојаноска.

Сега се на потег институциите да ја исправат грешката или пропустот кој е направен во 2015 година. Даријан е роден на 26 јануари во Прилеп, а почина на 30 јануари на Клиниката за детски болести каде што беше префрлен со возило на Итна медицинска помош.

НОВА го истражуваше овој случај во 2015 година. При породувањето настанале компликации и бебето со родилна тежина од 4 350 гр. останало без воздух. Новороденчето беше хоспитализирано на интензивна нега на Детската клиника во Скопје, а мајката поради искрварување(поради заостанати парчиња од плацентата) беше задржана на лекување во приватна болница во Битола.

ДСЗИ го истражуваше случајот, тогашниот министер за здравство Никола Тодоров ветуваше формирање на комисија и разврска на случајот, но се се заврши на тоа.

Пет години подоцна семејството се соочува со нови трауми. Иако, е направена обдукција и новороденчето е погребано по сите протоколи, во АД Бутел во масовна гробница со други починати бебиња, тоа се уште во институциите фигурира дека е живо.