По неколку години работа, бирократија и разни компликации, фудбалската легенда Дејвид Бекам ја доби дозволата да има свој тим во Американската фудбалска лига МЛС.
Неговиот тим ќе биде базиран во Мајами, Флорида.
„Нашата мисија да имаме МЛС тим во Мајами сега е реализирана и ние сме задоволни, благодарни и возбудени“, изјави Бекам во присуство на комесарот на лигата, Дон Гарбер, најавувајќи ја новата фудбалска франшиза.
Тимот на Бекам ќе биде поддржан со парите на бизнисмените Жорге и Хозе Мас, продуцентот Сајмон Фулер и сопственикот на СофтБанк, Масајоши Сон.
За сега нема најави за дресовите и амблемот на клубот.
Познато е дека клубот ќе настапува на стадион со капацитет од 25.000 седишта во Мајами.
Дејвид Бекам настапуваше за Манчестер Јунајтед, Реал Мадрид, ПСЖ, Милан а во меѓувреме помина пет години во Лос Анџелес Галакси.
Трансферот во Галакси го направи во 2007 година и е еден од најодговорните за популаризирање на овој спорт во Америка, каде што кошарката, бејзболот, рагбито и хокејот се најпопуларни спортови.
Бекам дефинитивно важи за почетник на кревање на нивото на гледаност на овој спорт во САД, а по него светските фудбалски легенди почнаа да прават трансфери во МЛС главно да ја завршат кариерата.
По Бекам, во САД се преселија и шпанскиот голгетер Давид Виља, легендата на Ливерпул, Стивен Џерард, италијанскиот виртуоз Андреа Пирло, најдобриот англиски лев бек изминативе години, Ешли Кол, легендата на Ирска, Роби Кин, а кариерата си ја воскреснаа и некогаш заборавените фудбалери Бредли Рајт Филипс, Обафеми Мартинс и Себастијан Џовинко.