Невладината „Граѓански иницијативи“ соопштува дека полицијата се уште е присутна во нивните простории и дека претресот влегол во 10-ти час.
Во текот на денот, полициските службеници беа во постојан контакт со Обвинителството и побараа повеќе од 100 документи поврзани со проектот на УСАИД, иако Граѓанските иницијативи располагаат само со пет проценти од буџетот за еден проект на УСАИД, се вели во соопштението.
Како што се посочува, оваа акција доаѓа по повеќенеделни медиумски најави на провладините таблоиди и режимски медиуми дека ќе се водат истраги против граѓански организации кои добиваат меѓународна финансиска поддршка.
Ваквиот наратив, кој со години се користи за дискредитирање на организациите кои се занимаваат со владеење на правото, демократијата и заштитата на човековите права, сега е преточен во конкретни институционални потези, кои јасно ја загрозуваат слободата на здружување и дејствување, се наведува во соопштението.
Граѓанските иницијативи укажуваат дека меѓународните документи кои ја гарантираат слободата на здружување, како што се Меѓународниот пакт за граѓански и политички права и Европската конвенција за човекови права, јасно дефинираат дека државите не смеат да користат репресивни мерки за ограничување на работата на граѓанските организации.
Во овој случај, полициската акција не е само средство за притисок врз една организација, туку дел од поширока стратегија за заплашување на сите актери вклучени во контролата на владата и заштитата на демократските вредности, наведува организацијата.
Работата на Граѓанските иницијативи, како што потсетуваат, од утрово е целосно оневозможена, а начинот на кој е спроведена оваа акција покажува дека не станува збор за редовна институционална проверка, туку за насочен притисок врз граѓанските организации. Ваквите злоупотреби на државните ресурси и институции за справување со критички гласови директно ги нарушуваат принципите на правна сигурност и на демократско општество, оценуваат тие.