Германското министерство за надворешни работи денеска ја пренесе порака што министерот за надворешни работи Зигмар Габриел му ја пренел на шефот на македонската дипломатија Никола Димитров, на вчерашната средба во Берлин.
-Новата македонска Влада имаше импресивен почеток и се фокусира на соработка со соседите преку амбициозни реформскии проекти и позитивни чекори, истакнал германскиот министер, соопшти Министерството.
Габриел исто така му ги пренел на Димитров честитките за првите 100 дена на Владата на премиерот Зоран Заев.
– Сега е клучно најавените реформи да се спроведат, а реформскиот процес во Македонија повторно да добива во интензитет. Само на тој начин Македонија може да напредува на патот на евро-атлантското приближување. Исто така, сакам да апелирам до актуелната опозиција да не го блокира добриот почеток на новата влада и да не одбива конструктивна соработка со владата. Бидејќи, сето тоа ќе биде за добро не само за ЕУ перспективата, туку и за граѓаните на земјата, кои се надеваат на напредок и подобрување на нивната животна ситуација, порачал Габриел.
Тој ја нагласил поддршката на Германија за евроатлантската перспектива на Македонија, како и на другите држави од Западен Балкан, која не е само политичка, туки и практична, со совети и дела, посочувајќи го како пример Берлинскиот процес.