Според движењето Беса, одлуката на Кривичниот суд да прераспредели десетина судии кои работеа на кривична материја во одделението за прекршоци претставува скандалозна интервенција на владејачките партии во судскиот систем во Македонија.
Имено Ѓоко Ристов од Одделението за организиран криминал е префрлен во кривичното оддделение, а во одделението за прекршоци заминуваат и Драган Николовски, Седат Реџепагиќ, Оља Ристова.
Прераспределена е и судијката на претходна постапка Весна Димишкова. Таа заминува во одделението за малолетници.
Станува збор за судијката која издаде наредба за претрес во предметот „Тврдина“ во станот на Коста Крпач и судијката која што на СЈО им го издаде налогот на претрес во УБК.
– Судиите, кои досега решиле за случаите на Специјалното Јавно Обвинителство и нивната замена со судии кои се знае дека се блиски со владејачката партија, претставува не само флагрантно кршење на автономијата на судовите, туку и директен упад во работата на единствената кредибилна институција во правниот систем – СЈО, порачува Беса.
Оттаму велат, платформата Редефинирање предвидува и реформирање на целиот правен систем, особено на судовите, и сето ова во корист на правдата без можности за политизација и исклучиво во корист на граѓаните.
– Судовите ќе бидат целосно независни и објективни и ова ќе се случи во многу блиска иднина. Во оваа прилика, уште еднаш го изразуваме нашиот став и нашата безрезервна поддршка за продолжување на работата на СЈО додека да се постигне целосна декриминализација на државниот систем, се вели во соопштението на Беса.