Движењето БЕСА очекува да има член на Државната изборна комисија на претстојните локални избори, во спротивно одлуките на Комисијата би биле нелегални и нелегитимни, изјави денеска пратеникот на БЕСА Фадил Зендели.
– Ако влеземе во локалните избори со овој состав на ДИК, имаме член во ДИК кој е нелегален и нелегитимен и согласно тоа и одлуките на ДИК ќе бидат нелегални и нелегитимни. Очекуваме тоа да се направи сега пред локланите избори и составот на ДИК да биде согласно со законот, рече Зендели. Откако ќе бидат донесени измените Собранието ќе распише оглас на кој ќе може да конкурираат потенцијалните кандидати за нов член на ДИК.
Пратеничките групи на владејачкото мнозинство и опозицијата денеска поднесоа измени на Изборниот законик, по скратена постапка, со кои се предвидува можност за разрешување на член на ДИК и пред истекот на неговиот мандат, со што ќе се овозможи БЕСА да добие член во ДИК.
Според информации од партијата БЕСА, најголеми шанси за член на ДИК има адвокатката Ермира Асани Салија, која е член на Централниот одбор на БЕСА, најверојатно на местото на Бедредин Ибраими од ДПА.
Зендели во изјавата кажа дека поддршка за нивниот предлог побарале од сите пратенички групи и дека согласно измените најдоцна 30 дена пред одржување на изборите ДИК треба го рефлектира резултатот од последните парламентарни избори. Но, промените ќе можат да се направат и веднаш по изборите доколку е потребно.