Антикризните мерки за поддршка на стопанството ќе траат се додека економијата не застане на здрави нозе, пишува во колумна министерот за финансии Фатмир Бесими. Тој посочува дека неопходно е да се продолжи со поддршката на фирмите, но и на граѓаните, пред се од социјален аспект, за да може да продолжи заздравувањето на економијата.
„Настојувањата, секако, ќе бидат во насока новите мерки кои ќе се носат да имаат истовремено и развоен карактер, односно покрај поддршката која ќе ја даваат да поттикнуваат и нови инвестиции, проширување на капацитетите и нови вработувања“ , вели Бесими.
Оценува дека новите мерки ќе создадат потреба за нови финансиски средства, кои преку различни механизми, треба да се донесат до инвеститорите. Финансирањето на буџетските дефицити преку странски извори, од една страна ќе го стимулира економскиот раст, а од друга создава услови за релаксација на монетарната политика, наведува Бесими.
Од почетокот на кризата, во С.Македонија донесени се шест пакети мерки во вредност од околу 1,2 милијарди евра или околу 11 отсто од БДП.
За споредба, согласно податоците на ММФ, фискалниот стимул во земјите во регионот се движи од 2,4 отсто од БДП во Бугарија, 3 отсто Босна и Херцеговина, 3,3 отсто во Албанија, 4 отсто во Црна Гора, 5 отсто Косово, 7 отсто Хрватска, Србија со 13,6 отсто и Грција и Словенија со околу 14 отсто од БДП.
Согласно податоците на Меѓународниот монетарен фонд, најголем број од земјите, продолжуваат со фискалниот стимул и во 2021 година, како земјите од регионот, така и равиените земји.