Најмалку едно лице загина во пожар во близина на туристичкиот град Манавгат во Анталија, Турција, соопштија властите. Според „Си-Ен-Ен“, лекарска помош досега побарале 62 лица.

Десет лица се заробени во шумскиот пожар што втор ден беснее во јужна Турција, соопшти денеска турскиот министер за земјоделство, Бекир Пакдемирли, додека продолжуваат напорите за спасување и гасење.

Пожарот, кој вчера изби поради пеколните температури во регионот, брзо се рашири од силниот ветар и се уште не е целосно ставен под контрола. Администрацијата на Анталија истакна дека ова е најсилниот пожар со кој се соочиле.

Пакдемирли рече дека 82-годишен маж е пронајден мртов за време на евакуацијата на областа Кепезбелени, 16 километри северо-источно од Манавгат, а 10 лица се заглавени во близина на браната Ојмапинар, рече тој. Единици се обидуваат да ги спасат луѓето, рече Пакдермирли.

Властите евакуираа 18 села и области во Анталија додека уште 16 села се евакуирани во соседните провинции Адана и Мерсин, додаде турскиот министер.

Сите туристички екскурзии во овој регион се суспендирани до нормализирање на состојбата. Пожарот не претставува опасност за туристичките места.