Во тешката сообраќајна несреќа што се случи вчера попладне на магистралниот пат Струмица – Радовиш, пред крстосницата за селото Василево, загина С.Г. (34) од село Градашорци, потешко се повредени три лица, додека со полесни повреди се здобиле петмина.
Во денешниот полициски билтен се наведува дека во сообраќајката учествувале автомобил „опел астра“, со скопски регистарски ознаки, сопственост на правно лице, а управувано од Е.С. (55) од Скопје, во кое имало 11 мигранти од Пакистан, патничко возило „фолксваген пасат“, управувано од С.Г. (34), со сопатник С.Г. (57), и двајцата од село Градашорци, Струмичко и патничко возило „ауди“, управувано од Д.К. од Скопје со тројца сопатници.
Началникот на Хируршкото одделение при струмичката болница, Гошко Гошев изјави дека на лекување биле донесени повеќе лица од кои најтешко повреден бил еден мигрант кој е пренесен на лекување во Клиничкиот центар во Скопје.
„Денеска во Скопје треба да биде пренесен и возачот кој ги превезувал мигрантите, а потешко е повредена и сопатничката од автомобилот на загинатиот. На сите примени пациенти им е укажана соодветна лекарска помош и нега и постапено е според протоколите за Ковид-19“, рече доктор Гошев.
Според очевидци во автомобилот „опел астра“ имало мигранти кои се превезувале со голема брзина. Бегајќи од полицијата најпрвин удрил во „пасатот“ потоа во „аудиото“, кое поминало без поголеми последици, и педесетина метри потоа излетал од патот и се забил во ѕид. Дел од повредените биле извлечени со помош на пожарникари од ТППЕ-Струмица, кои користеле специјални хидраулични алатки.