Андреа Белоти (22) е „златна кокошка“ на Торино. Напаѓачот игра во фантастична форма во оваа сезона, моментно е лидер на листата на стрелци во Серија А со 22 гола и не чуди што привлекува внимание на многу клубови во Италија, но и во Европа.
Како што пишува италијанскиот весник „Тутоспорт“, Арсенал и Наполи се подготвени да платат 50 милиони евра за услугите на Белоти, сума што се смета како прва во низата и, секако, недоволна за челниците на Торино кои одредија двојно поголема (100 милиони евра) како откупна клаузула за својот фудбалер.
Наполи, се наведува притоа, има и адут плус во обидот за привлекување на Белоти. Наполитанците се подготвени во евентуалната зделка да го вклучат и напаѓачот Леонардо Паволети кој на „Сан Паоло“ пристигна од Џенова.
Но, тешко е да се очекува омекнување на Урбано Каиро, прв човек на „торинезите“, бидејќи и досега, во неколку ситуации при купопродажба на играчи, се покажа како цврст преговарач.