Првиот потпретседател на косовската влада, Бесник Бислими, кој е задолжен и за процесот на дијалог со Србија во Брисел, изјави дека вчерашното враќање на Српската листа во косовското собрание докажува оти нивното заминување е дел од стратегијата на Белград и оти ги разобличува „валканите игри“ на српските власти пред меѓународната заедница, но и самите граѓани на Србија кои гласаа за овој политички субјект.

„За мене враќањето на Српската листа во Собранието или нивната замена на пратеничките места е јасен доказ за нашиот аргумент дека нивното заминување немаше основа за евентуално незадоволство, туку беше дел од стратегијата на Белград. Немаше промена од моментот на поаѓање до моментот на враќање. Според тоа, како што самите кажаа, тоа е дел од нивната стратегија, па покажуваат дека градат стратегија за слабеење на функционирањето на нашите институции“, потенцираше Бислими синоќа во интервју за Радиотелевизија Косово, пренесе Н1.

Ова, смета Бислими, „ги разобличува и пред меѓународната заедница, иако повеќето од нив знаат дека тоа се валкани политички игри на Белград, а не на Српска листа“.

„Па, можеби е позитивно што ова демаскирање е пред граѓаните на Србија кои гласаа за нив. Мандатот на претставник се бара со цел да се промовираат и да се подобрат интересите на одредена група. Српската листа реализираше нула интереси. Со тоа таа им покажа на граѓаните дека нејзината намера не е да ги застапува нивните или интереси, туку да ги кочи агендите на државата Косово“, додаде Бислими.

Тој рече дека не смета дека попречувањето на натамошниот развој на Косово е во интерес на граѓаните на Србија.

„Српската листа претходно ги изневери сопствените гласачи за да може да ја спроведе непријателската програма на Белград на Косово“, заклучи тој.

Извор: Н1