Претседателот на Регулаторната комисија за енергетика Марко Бислимоски сè уште се консултира со своите адвокати дали да поднесе приватна тужба против лицето кое физички го нападна во вторникот вечерта во угостителски објект во Скопје.
Постапката е во тек. Ќе ги советувам моите адвокати и ќе видиме како ќе постапам и како ќе го решиме тој проблем. Напаѓачот не ми се извини мене и воопшто не е битно дали ќе ми се извини или не. Треба да се извини на институцијата, бидејќи јас ја претставувам институцијата. Марко е денес, утре ќе биде Петко, Станко. Сите треба да имаме однос кон институциите во оваа држава, бидејќи институциите ја чинат државата. Интересот на државата е секогаш најбитен и ќе остане вечно, рече Бислимоски во одговор на прашањето дали ќе поднесе приватна тужба до напаѓачот во изјавата дадена во Стопанската комора.
Претседателот на РКЕ во вторникот вечерта физички беше нападнат во угостителски објект во централното подрачје на Скопје од лице што поседува лиценца за продажба на електрична енергија за кое РКЕ почна постапка за одземање на лиценцата поради неисполнување на обврските од договорот за снабдување кај дел од корисниците.