Минималната плата ќе биде 18.000 денари и тоа ќе се случи, штом се постигне договор меѓу Владата, синдикатите и работодавците. Енергетската криза, економската криза и политичките состојби не дозволија минималната плата да се зголеми уште во месец декември, но раст на минималната плата во следниот период ќе има, порача потпретседателот на СДСМ, Фатмир Битиќи во гостување во ТВ Алсат.
Минимална плата во 2016 година беше 9.000 денари или 38 отсто од просечна, на крај на декември во 2021 година, просечна плата е 29.145 денари, а минималната плата во ноември во 2021 година е на ниво од 52,2 отсто од просечната плата. За четири години уделот на минималната плата во просечната плата е за цели 14 процентни поени. И ова е еден од показателите кој влијае на намалување на сиромаштијата. Дополнително, со социјалната реформа што ја спроведовме се влијаше врз степенот на сиромаштија и ако не ја преземавме оваа реформа, сега во време на пандемија ќе зборувавме за многу поголема стапка на сиромаштија од она што е во моментот. Ние во овој момент имаме околу 35.000 корисници на гарантиран минимален приход, наспроти околу 80.000 луѓе кои претходно добиваа социјална помош по три или четири илјади денари. Да не го занемаруваме и фактот дека со помош на економските мерки за помош во време на пандемијата, Владата успеа да спаси околу 60.000 работни места, што беше потврдено и од Меѓунардониот монетарен фонд, порача Битиќи.
Во однос на енергетската криза, потпретседателот Битиќи посочи дека уште минатата година Владата го намали ДДВ за електрична енергија од 18 на 5 отсто, а сега ќе следуваат нови мерки, од кои првата од нив е субвенционирање од 600 до 800 денари месечно на сметките за електрична енергија за 7.500 семејства со ниски примања.