Фатмир Битиќи, вицепремиерот за економски прашања вечерва во ТВ21 во емисијата „Клик Плус“ кажа дека во време на криза треба сите да бидат солидарни, и дека не може да прифати некој добро да заработува на грбот на земјоделците.
„Зошто јас реагирам кај крајните продавачи? Реагирам затоа што не можам да прифатам продуктот кој земјоделецот ви го дава за девет денари, на трпеза завршува со 69 денари. Тоа не можам да го прифатам“, изјави Битиќи.
Вицепремиерот исто така додаде дека спасени се преку 60.000 работни места, во изминатиот период од две години додека траеше кризата.
„Две години повторуваме дека сме во криза. Прво здравствена поради глобалната пандемија, и сега најново со војната во Украина. Ние спасивме преку 60 илјади места, наспроти 19 илјади загубени работни места. Ќе беше многу тешко да се загубеа уште 60 илјади“, појасни Битиќи.
Битиќи вечерва информираше дека 17 корисници кои што се во сегментот на регулиран пазар употребуваат 30% од електричната енергија, која што се продава на регулираниот пазар.
-Секако, тоа не сме ние како домаќинства. Ако се во функција на производство, не треба да бидат на регулиран пазар. Тоа значи дека земаат струја од секое едно домаќинство и прават штета на другата страна. Ги знаат во РКЕ. Ќе се справиме со нив така што, со тарифниот модел кој што го воспоставуваме, автоматски ќе излезат од регулираниот пазар. Тоа значи дека ќе ни се ослободи 20% од струјата, за да ја ставиме во функција на стопанството, рече Битиќи.