Челзи и Арсенал одиграа 0:0 во дербито на петтото коло во Премиерлигата. „Топчиите“ беа за нијанса поблиску до трите бода според создадените шанси на „Стемфорд бриџ“, а притоа го одиграа и најдобриот меч во дефанзива во сезоната. Ремси погоди статива во прво полувреме, по него и Лаказает промаши зицер, Мустафи постигна гол во второто полувреме што беше поништен поради недозволена позиција. И „сините“ се заканија неколкупати во текот на средбата пришто за издвојување е ситуацијата „очи во очи“ на Педро со Петр Чех во првото полувреме и ударот на Еден Азар во второто, меѓутоа мрежите во западен Лондон мируваа.
Во отсуство на голови, епитетот „играч на дербито“, во негативен контекст, го понесе Давид Луиз. Бразилецот во вториот дел собра два жолти картона од судијата Мајкл Оливер. Првиот го доби во 52 минута при обидот да поентира со „ножички“, но наместо топката го закачи Кошчелни, кој за среќа мина без последици, вториот го заработи во 87. по стартот со отворен ѓон врз Сеад Колашинац.
Челзи за првпат не успеа да постигне гол на домашен терен по 27 меча под водство на Антонио Конте. Затоа продолжи со негативниот тренд на исклучувања во дуелите со Арсенал. Мозес „поцрвене“ во финалето во ФА купот на 27 мај, Педро во „Комјуниту шилд“ мечот на 6 август и сега Давид Луис.
Арсенал, пак, за првпат успеа да сочува „чиста“ мрежа на „Стемфорд бриџ“ во премиерлигашки настап од 2005 година.
„Сините“ во нареднит викенд ќе гостуваат на стадионот „Британија“ на екипата на Стоук додека „топчиите“ ќе играат на „Емирати“ против ВБА.
Премиерлига, 5 коло
Челзи – Арсенал 0:0
Манчестер јунајтед – Евертон (во тек)
Тотенхем – Свонси 0:0
ВБА – Вест Хем 0:0
Вотфорд – Манчестер сити 0:6
Њукасл – Стоук 2:1
Ливерпул – Барнли 1:1
Хадерсфилд – Лестер 1:1
Кристал палас – Саутемптон 0:1
Борнмут – Брајтон 2:1
Табела: Манчестер сити 13, Манчестер јунајтед 10 (-1), Челзи 10, Њукасл 9, Тотенхем 8, Хадерсфилд 8, Барнли 8, Ливерпул 8, Саутемптон 8, ВБА 8, Вотфорд 8, Арсенал 7, Стоук 5, Свонси 5, Лестер 4, Брајтон 4, Евертон 4 (-1), Вест Хем 4, Борнмут 3, Кристал палас 0.