Хуманитарен онлајн концерт на битолчанец во саботата заврши крваво, но, за среќа, без посериозни последици. Музичарот Пеце Петровски (29) решил со јавен настап на социјалните мрежи да даде поддршка на малиот Лука од соседството кој е со аутизам, но и за подигнување на јавната свест и случајот со момчето да допре до надлежните институции. Но, перформансот од својот дом морал да го прекине во еден момент, бидејќи бил нападнат и расечен со нож од сосед за кого најавува тужба.

Фото: facebook

„За време на настапот, почнав да слушам удари со камења на мојот прозорец. Прекинав за да видам што се случува. Го видов Бојан од соседната зграда кој беше видно вознемирен, па и хистеричен. Почна да вика по мене, да ме навредува, а набрзо потоа ми дојде и на врата. Ми рече дека не можел да спие на што се обидов да му појаснам за што се работи. Во еден момент извади нож и ме расече по раката по што се обиде уште еднаш во што го спречи колегата Дарко. Потоа Бојан стана и тргна кон дома и ми дофрли – „имаш среќа што не дојдов со сатарот“. Вакво нешто досега не сум доживеал, а сум правел многу проби и свирки. Музиката беше во одредени децибели, ако толку му пречеше можеше да пријави во полиција“, раскажува Петровски.

Петровски го посветил концертот на Лука чија мајка, според него, се соочува со проблеми со дел од соседите и која неколкупати, како што вели, се пожалила од еден комшија кој не сакал да живеат во близина поради аутизмот на детето.

По инцидентот, Петровски со возило на Итна помош бил превезен до Ургентниот центар во Битола каде му била санирана повредата, а потоа и во полиција да даде изјава за случајот.

„Ангажирав адвокати и ќе поднесам приватна тужба. Соседот е приведен, а ножот му е одземен“, истакна Петровски.