На состанокот се разговарало за реализација на инфраструктурните проекти поддржани од ЕБОР.
Изградбата на Коридорот 8 останува врвен приоритет на оваа Влада, посочил министерот за транспорт и врски Благој Бочварски, кој денеска оствари работен состанок со Анди Аранитаси, претставникот на ЕБОР за Република Северна Македонија и со претставници на Банката од Лондон.
На состанокот се разговарало за реализација на инфраструктурните проекти што се работат со финансиска поддршка на ЕБОР, информираа од Министерството за странство.
Министерот Бочварски ги запознал претставниците на Банката за изградбата на железничката пруга на Коридорот 8, финансирана од ЕБОР, притоа потенцирајќи дека напролет започнуваат со изградба првата и втората фаза, односно делницата од Куманово до Крива Паланка.
На средбата се разговарало и за финализирање на финансиската конструкција за изградба на втората фаза од автопатот Скопје – Блаце.
„Од двете страни е изразено задоволство што проектите течат со предвиденото темпо и посочија дека соработката помеѓу ЕБОР и Министерството за транспорт и врски во наредниот период дополнително ќе се продлабочува. Министерството за транспорт и врски останува силно посветено во реализација на крупните капитали инвестиции со што се покажува намерата на Владата во изградбата на целокупната инфраструктура во земјата“, се вели во соопштението.