„Одговорност се презема лично, храбро пред оние кои те избрале, а не кукавички, во бегство криејки се зад диктатори кои делат слични убедувања со вас“, кажа Павле Богоевски откако Собранието ја констатираше неговата оставка на пратеничката функција.
Тој ја обвини опозицијата дека со ВМРО ДПМНЕ и денес раководи „пастирот Груевски“. Доказ за тоа, според Богоевски е тоа што пратениците на ВМРО ДПМНЕ не собрале храброст на Комисијата за деловнички и мандатно имунитетни прашања да гласаат за одземање на мандатот на Груевски, и покрај очигледното отсуство од 6 месеци во Собранието.
„И Мицкоски како Груевски се обиде да се скрие зад пратениците кои не гласаа за одземање на мандатот на Грувсеки. Но, пратеничката група на СДСМ не дозволи да зема плата од народот за да ужива во скапи хотели и забави на бродови на Дунав.
Од денеска, Груевски е само бегалец од правдата и ништо повеќе од тоа и тој единствено со лисици може да се врати во земјава“, кажа Богоевски.
Богоевски поднесе оставка откако беше објавен телефонски разговор во кој тој нарачува масло од канабис. Тој рече дека нема увид во истрагата која се води, но дека „без разлика што ќе покаже истрагата, сум подготвен да се соочам со последиците“ .
Оставката на Богоевски беше констатирана на денешната седница, на која беше констатирана и оставката на Груевски. Оставката, Груевски ја поднесе на 5 овој месец, откако претходно собраниската Комисија му предложи на Собранието да му го одземе мандатот поради отсуството од 6 месеци од Собранието, како што е предвидено и во законот. Груевски избега во Унгарија откако беше осуден на казна затвор за случајот со набавката на луксузниот мерцедес.
Ѓорѓи Камчев од ВМРО-ДПМНЕ и Александар Филиповски ќе бидат новите пратеници во Собранието.
Извештајот за констатираните оставки на пратениците ќе биде испратен до ДИК која веднаш на седница ќе ги констатира и ќе ги предложи Камчев и Филиповски за нови пратеници.
Се очекува информацијата за двајцата нови пратеници ДИК да ја проследи во текот на попладнево.
Ѓорги Камчев доаѓа од редовите од ВМРО-ДПМНЕ од листата за пратеници од четвратата изборна единица, додека Александар Филиповски беше на листата на СДСМ во првата изборна единица.